ವರುಷಕ್ಕೊಮ್ಮೆ ದರ್ಶನ ನೀಡುವ ಹಾಸನಾಂಬೆ ಮಹಾತ್ಮೆ ಗೊತ್ತೇ..?

hasanambe

– ದ್ಯಾವನೂರು ಮಂಜುನಾಥ್

ಶಕ್ತಿ ದೇವತೆ, ಗ್ರಾಮ ದೇವತೆ ಶ್ರೀ ಹಾಸನಾಂಬೆ. ಈಕೆಯನ್ನು ಹಾಸನಮ್ಮ, ಸಪ್ತ ಮಾತೃಕೆಯರೆಂದು ಕರೆಯುವರು. ಮಹಾಭಾರತದ ಕಾಲದಲ್ಲಿ ಅರ್ಜುನನ ಮೊಮ್ಮಗ ಜನಮೇಜಯ ಇಲ್ಲಿಯೇ ಆಳ್ವಿಕೆ ನಡೆಸಿದ್ದು. ಅಂದರೆ ಶಾಪಗ್ರಸ್ತವಾಗಿದ್ದ ಕಾಲದಲ್ಲಿ ಇಲ್ಲಿ ನೆಲೆಸಿದ್ದ. ನಂತರ ಸಿಂಹಾಸನಪುರ ಆಡು ಮಾತಿನಿಂದ ಹಾಸನ ಎಂಬಂತಾಗಿದೆ ಎಂದು ಸ್ಥಳ ಪುರಾಣ ತಿಳಿಸುತ್ತದೆ. ಹಾಸನ ಬಳ್ಳಿ ಎಂಬ ಸಸ್ಯದಿಂದ ಈ ಊರಿಗೆ ಹಾಸನ ಎಂದು ಹೆಸರು ಬಂದಿರಬಹುದು.

ಇನ್ನೊಂದು ಸ್ಥಳ ಪುರಾಣದ ಪ್ರಕಾರ, ಸಪ್ತಮಾತೃಕೆಯರಾದ ವೈಷ್ಣವಿ, ಇಂದ್ರಾಣಿ, ಮಹೇಶ್ವರಿ ಕುಮಾರಿ, ಬ್ರಾಹ್ಮೀದೇವಿ, ವರಾಹಿ ಮತ್ತು ಚಾಮುಂಡಿಯರು ವಾರಣಾಸಿ (ಕಾಶಿ) ಯಿಂದ ದಕ್ಷಿಣದ ಕಡೆಗೆ ವಿಹಾರಕ್ಕೆ ಬಂದಾಗ ಪ್ರಕೃತಿಯ ಸೌಂದರ್ಯಕ್ಕೆ ಮನಸೋತು ಇಲ್ಲೇ ನೆಲೆಸಲು ನಿರ್ಧರಿಸಿದರು. ಅವರುಗಳಲ್ಲಿ ವೈಷ್ಣವಿ, ಕುಮಾರಿ, ಮಹೇಶ್ವರಿಯರು ಹಾಸನಾಂಬ ದೇವಾಲಯದಲ್ಲಿ ಹುತ್ತದ ರೂಪದಲ್ಲಿ ಹಾಗೂ ಬ್ರಾಹ್ಮೀ ದೇವಿಯು ಕೆಂಚಮ್ಮನ ಹೊಸಕೋಟೆಯಲ್ಲಿ ನೆಲೆಸಿದರು. ಇನ್ನುಳಿದ ದೇವತೆಗಳಾದ ಚಾಮುಂಡಿ, ವರಾಹಿ, ಇಂದ್ರಾಣಿಯರು ನಗರದ ಮಧ್ಯಭಾಗದ ದೇವಿಗೆರೆಯ ಬಳಿ ನೆಲೆಸಿದರು ಎನ್ನಲಾಗಿದೆ. ಸಪ್ತಮಾತೃಕೆಯರು ಸದಾ ನಗುವ (ಹಸನ) ದೇವತೆಯರಾಗಿದ್ದಾರೆ. ಹಾಗಾಗಿ ನಸು ನಗುವ ದೇವತೆಗಳು ನೆಲೆಸಿರುವುದರಿಂದ ಹಸನ ಎಂಬ ಪದ ಮುಂದೆ ಹಾಸನ ಆಗಿದೆ.

ಐತಿಹಾಸಿಕವಾಗಿ ಈ ಸ್ಥಳ ಮೌರ್ಯರ ನಂತರ ಚೋಳ ಅರಸರ ಅಧಿಪತಿಯಾದ ಬುಕ್ಕ ನಾಯಕ ಮತ್ತು ಅವನ ವಂಶಸ್ಥರು ಕ್ರಿ.ಶ ಸುಮಾರು 11 ನೆಯ ಶತಮಾನದಿಂದ ಒಂದು ವರ್ಷಕ್ಕೂ ಹೆಚ್ಚು ಕಾಲ ಆಳಿದರು ಎಂದು ತಿಳಿದು ಬರುತ್ತದೆ.
ಹೊಯ್ಸಳರಿಗೂ ಪೂರ್ವ ಕಾಲದಲ್ಲಿ ಇದು ಗಂಗರ ಆಡಳಿತಕ್ಕೆ ಒಳಪಟ್ಟಿತ್ತು. ಬುಕ್ಕ ನಾಯಕ ತನ್ನ ವಿಜಯೋತ್ಸವ ನೆನಪಿಗಾಗಿ ಒಂದು ಕೋಟೆಯನ್ನು ಕಟ್ಟಿ ಆ ಸ್ಥಳಕ್ಕೆ ಚನ್ನಪಟ್ಟಣ (ಚೆಲುವಾದ ಪಟ್ಟಣ) ಎಂದು ಹೆಸರಿಟ್ಟನಂತೆ. ಬುಕ್ಕ ನಾಯಕನ ನಂತರ 12ನೆ ಶತಮಾನದಲ್ಲಿ ಕೃಷ್ಣಪ್ಪನಾಯಕ ಎಂಬ ಪಾಳೇಗಾರನಿಗೆ ಸೇರಿತು.
ಈ ನಾಯಕ ಒಮ್ಮೆ ಪ್ರಯಾಣ ಹೊರಟಾಗ ಒಂದು ಮೊಲ ಅಡ್ಡ ಬಂದು ಪಟ್ಟಣವನ್ನು ಪ್ರವೇಶಿಸಿತು. ಈ ಅಪಶಕುನದಿಂದ ನಾಯಕ ನೊಂದುಕೊಂಡನಂತೆ. ಆಗ ಅವನಿಗೆ ಹಾಸನಾಂಬೆ ಪ್ರತ್ಯಕ್ಷಳಾಗಿ ಮಗು ಖಿನ್ನ ಮನಸ್ಸು ತೊರೆದು ಈ ಸ್ಥಳದಲ್ಲಿ ಒಂದು ಕೋಟೆ ಹಾಗೂ ಕೊಳವನ್ನು ಕಟ್ಟು ಎಂದು ಹೇಳಿದಳಂತೆ.
ಹಾಗೇ ಒಂದು ಕೋಟೆಯನ್ನು ಕಟ್ಟಿ ಅದಕ್ಕೆ ಚನ್ನಪಟ್ಟಣ ಎಂಬ ಹೆಸರಿಸಿ ಕೊಳದ ಹೆಸರಿನಲ್ಲಿ ದೇವಿಗೆರೆಯನ್ನು ಕಟ್ಟಿಸಿದನೆಂದು ಪ್ರತೀತಿ.

ಚೋಳರಿಂದ ಆಡಳಿತಾಧಿಕಾರಿಯಾಗಿ ನೇಮಿಸಲ್ಪಟ್ಟ ಬುಕ್ಕನಾಯಕ ತನ್ನ ಮೊಮ್ಮಗ ಚನ್ನಪ್ಪನಾಯಕನ ಹೆಸರಿನಲ್ಲಿ ಕೆರೆ ಕಟ್ಟಿಸಿ ಕೋಟೆ ನಿರ್ಮಿಸಿ ಗ್ರಾಮಕ್ಕೆ ಚನ್ನಪಟ್ಟಣ ಎಂಬ ಹೆಸರು ಬಂತೆಂದೂ, ಕೃಷ್ಣಪ್ಪನಾಯಕನ ಆಳ್ವಿಕೆ ಕಾಲದಲ್ಲಿ ಹಸನಾಂಬ ದೇವಾಲಯ ನಿರ್ಮಾಣವಾಯಿತು ಎಂದು ಹಾಸನ ತಾಲ್ಲೂಕಿನ ಕುದುರುಗುಂಡಿ ಗ್ರಾಮದಲ್ಲಿರುವ ಕ್ರಿ.ಶ. ಸುಮಾರು 1140ರ ವೀರಗಲ್ಲಿನ ಶಿಲಾ ಶಾಸನದಿಂದ ತಿಳಿದು ಬರುತ್ತದೆ.
ಇನ್ನೊಂದು ದಂತ ಕಥೆಯ ಪ್ರಕಾರ, ಹಾಸನ ಒಂದು ದೊಡ್ಡ ಕಾಡಂತೆ. ಪಕ್ಕದ ಪಟ್ಟಣ ಚನ್ನಪಟ್ಟಣದ ದನಗಳೆಲ್ಲ ಇಲ್ಲಿಗೆ ಬಂದು ಮೇಯುತ್ತಿದ್ದವಂತೆ.

ಆ ಹಸುಗಳಲ್ಲಿ ಒಂದು ಪ್ರತಿ ದಿನ ಸಂಜೆಯ ಸಮಯದಲ್ಲಿ ಕಾಡಿನ ಒಂದು ಹುತ್ತದ ಮೇಲೆ ಹಾಲು ಸುರಿಸುತ್ತಿತ್ತಂತೆ. ಮನೆಯಲ್ಲಿ ಕರೆದರೆ ಹಾಲಿನ ಬದಲು ಬರೀ ರಕ್ತ ಬರುತ್ತಿತ್ತಂತೆ. ಪ್ರತಿ ದಿನ ಯಾರು ಹಾಲನ್ನು ಕರೆದುಕೊಳ್ಳುತ್ತಿದ್ದಾರೆಂದು ಅನುಮಾನದಿಂದ ಗಮನಿಸಿದಾಗ ವಾಸ್ತವದ ಸಂಗತಿ ತಿಳಿದು, ಆ ವಿಷಯವನ್ನು ಪಾಳೆಗಾರ ಕೃಷ್ಣಪ್ಪನಾಯಕನಿಗೆ ತಿಳಿಸಿದರಂತೆ.

ಆಗ ಆತ ಇದೇನು ಅಶುಭ ಎಂದು ಚಿಂತೆಯಲ್ಲಿರುವಾಗ ದೇವಿಯು ಆತನ ಕನಸಿನಲ್ಲಿ ಬಂದು ಇಲ್ಲಿ ಒಂದು ಕೋಟೆಯನ್ನು ಕಟ್ಟಿಸಿದನು ಎಂದು ಪ್ರತೀತಿ ಇದ್ದು, ಹಸುವು ಹಾಲು ಸೂಸುತ್ತಿದ್ದುದರಿಂದ ಈ ಸ್ಥಳಕ್ಕೆ ಹಸುವಿನ ಕೋಟೆ, ಹಸನ ಕೋಟೆ, ಹಾಸನ ಕೋಟೆ ಹಾಸನ ಎಂಬ ಹೆಸರು ಬಂದಿದೆ ಎನ್ನಲಾಗಿದೆ.
ಹೀಗೆ ಹಾಸನ ಎಂಬ ಪದದ ಸುತ್ತ ಕಥೆಗಳು ಸೃಷ್ಟಿಯಾಗಿ ಮೂಲ ತಿಳಿಯದೆ ಹೋಗಿದೆ.
ಬೀರನಹಳ್ಳಿ ಕೆರೆ, ಚನ್ನಪಟ್ಟಣ ಕೆರೆ, ಹುಣಸಿನ ಕೆರೆ, ಸತ್ಯಮಂಗಲ ಕೆರೆ ಮಾಕನಕೆರೆ ಹೀಗೆ ಸುತ್ತಲೂ ನೀರಿನಿಂದಾವೃತವಾದ ಗುಡ್ಡ ಪ್ರದೇಶವೆ. ಸಿಂಹಾಸನಪುರಿ ಅರ್ಥಾತ್ ಹಾಸನವಾಗಿದೆ. ಇಲ್ಲಿರುವ ಹಾಸನಾಂಬ ದೇವಾಲಯ ಪಾಳೆಗಾರರ ಕಾಲದಲ್ಲಿ ನಿರ್ಮಿಸಲಾಗಿದ್ದು, ಇಲ್ಲಿಯ ದೇವತೆಯರನ್ನು ದೇವಾನು ದೇವತೆಗಳ ಹಾಗೆ ಕೆತ್ತನೆಯಲ್ಲಿರದೆ ಹಾಸನಾಂಬೆ ದೇವಿಯು ಹುತ್ತದ ರೂಪದಲ್ಲಿ ನೆಲೆಸಿರುವುದನ್ನು ಕಾಣಬಹುದು.

ಸಪ್ತ ಮಾತೃಕೆಯರ ಜನನ:
ಸಪ್ತ ಮಾತೃಕೆಯಾದ ಹಾಸನಾಂಬೆ ಹಾಸನದಲ್ಲಿ ನೆಲೆಸಿರುವುದಕ್ಕೆ ದಂತ ಕಥೆ ಇದ್ದಂತೆ ಸಪ್ತ ಮಾತೃಕೆಯರು ಹೇಗೆ ಜನಿಸಿದರು ಎಂಬುದಕ್ಕೆ ದಂತ ಕಥೆ ಇದೆ. ದೀಪಾವಳಿ ಬೆಳಕಿನ ಹಬ್ಬ. ಈ ದೀಪಾವಳಿ ಹಿನ್ನೆಲೆಯಲ್ಲಿ ಸಪ್ತಮಾತೃಕೆಯರು ಹುಟ್ಟಿನ ಗುಟ್ಟು ಇದೆ. ಬ್ರಹ್ಮನ ವರದಿಂದ ಉನ್ಮತ್ತನಾದ ಅಂಧಕಾಸುರನನ್ನು ದೇವತೆಗಳ ಪ್ರಾರ್ಥನೆಯನ್ನು ಮನ್ನಿಸಿ ಆತನ ವಧೆಗೆ ಸಿದ್ಧನಾಗುತ್ತಾನೆ. ನೆಲಕ್ಕೆ ಬೀಳುವ ಅಂಧಕಾಸುರನ ರಕ್ತದ ಪ್ರತಿ ಹನಿಯಿಂದಲೂ ಇನ್ನೊಬ್ಬ ಅಂಧಕಾಸುರನು ಹುಟ್ಟುತ್ತಿರಲು ಅವನ ರಕ್ತ ನೆಲಕ್ಕೆ ಬೀಳುವುದನ್ನು ತಡೆಯುವ ಸಲುವಾಗಿ ತನ್ನ ಬಾಯಿಯಿಂದ ಶಿವನು ಒಬ್ಬ ಶಕ್ತಿಯನ್ನು (ಯೋಗೇಶ್ವರಿ) ಸೃಷ್ಟಿಸಿದ. ಇತರ ದೇವತೆಗಳು ಶಿವನ ಸಹಾಯಕ್ಕೆ ತಮ್ಮ ಶಕ್ತಿಯನ್ನು ಕಳುಹಿಸಿದರು. ಹೀಗೆ ಜನ್ಮ ತಾಳಿದವರೇ ಸಪ್ತ ಮಾತೃಕೆಯರು. ಈ ಸಪ್ತ ಮಾತೃಕೆಯಲ್ಲಿ ಹಾಸನಾಂಬ ದೇವಿ ಒಬ್ಬಳಾಗಿದ್ದಾಳೆ.

ಹೀಗೆ ಜನಿಸಿದ ಸಪ್ತ ಮಾತೃಕೆಯರು, ಹಿಂದು ದೇವಗಣದಲ್ಲಿ ಸಪ್ತ ಮಾತೃಕೆಯರಿಗೊಂದು ವಿಶಿಷ್ಟ ಸ್ಥಾನವಿದೆ. ದೇವಿಯ ದರ್ಶನ: ಹಾಸನನಾಂಬ ದೇವಿಯನ್ನು ಭಕ್ತರು ಸದಾ ಕಾಲವು ದರ್ಶನ ಮಾಡಲು ಸಾಧ್ಯವಿಲ್ಲ. ವರ್ಷಕ್ಕೊಮ್ಮೆ ಆಶ್ವೀಜ ಮಾಸ ಪೂರ್ಣಿವೆಯ ನಂತರ ಬರುವ ಗುರುವಾರದಂದು ಬಾಗಿಲು ತೆರೆದರೆ ಬಲಿಪಾಡ್ಯವಿಯ ಮೂರನೆ ದಿನ ಬಾಗಿಲನ್ನು ಮುಚ್ಚಲಾಗುವುದು. ಬಾಗಿಲು ಮುಚ್ಚುವ ದಿವಸ ಹಚ್ಚಿದ ದೀಪವು ಮುಂದಿನ ವರ್ಷ ಬಾಗಿಲು ತೆರೆಯುವ ತನಕ ಗರ್ಭಗುಡಿಯಲ್ಲಿ ಉರಿಯುವುದು. ಹಾಗೆ ದೇವಿಗೆ ಮುಡಿಸಿದ ಹೂ ಸಹ ಬಾಡಿರುವುದಿಲ್ಲ.. ಪ್ರಸಾದ ಹಳಸುವುದಿಲ್ಲ. ಇದು ಹಾಸನಾಂಬೆ ದೇವಿಯ ವಿಶೇಷ ಮಹಿಮೆ ಹಾಗೂ ದೇವಾಲಯದಲ್ಲಿ ನಡೆದು ಬಂದಿರುವ ಪ್ರತೀತಿ.

ದೇವಿ ದರ್ಶನಕ್ಕೆ ಆರಂಭದ ದಿನ:
ಹಾಸನಾಂಬ ದೇವಿಯ ಬಾಗಿಲು ತೆರೆಯುವ ದಿವಸ ಎಲ್ಲ ತಳವಾರ ಮನೆತನದವರು ಹಾಜರಿದ್ದು, ದೇವಿಯ ಗರ್ಭಗುಡಿಯ ಮುಂದೆ ಬಾಳೆ ಕಂದನ್ನು ಅರಸು ಮನೆತನದವರಿಂದ ನೆಟ್ಟು ದೇವಿಯನ್ನು ಭಜಿಸುತ್ತ ಅರಸು ಮನೆತನದವರಾದ ನರಸಿಂಹರಾಜು ಅರಸು ಬಾಳೆ ಕಂದನ್ನು ಕತ್ತರಿಸಿದ ನಂತರವೇ ದೇವಾಲಯದ ಬಾಗಿಲನ್ನು ತೆರೆಯುವುದು ಮೊದಲಿನಿಂದಲೂ ನಡೆದು ಬಂದಿರುವ ಪದ್ಧತಿಯಾಗಿದೆ.
ಗರ್ಭಗುಡಿಯ ಬಾಗಿಲನ್ನು ತೆರೆದ ಕೂಡಲೆ ಭಕ್ತರು ಹಾಸನಾಂಬೆಯ ದರ್ಶನ ಮಾಡಬಾರದು. ಅದರಿಂದ ಅಪಾಯವಾಗುವ ಸಾಧ್ಯತೆ ಹೆಚ್ಚಿದೆ ಎನ್ನುವುದು ಜನರ ನಂಬಿಕೆಯಾಗಿದೆ. ಆ ಕಾರಣಕ್ಕೆ ದೃಷ್ಟಿ ನಿವಾರಣೆಗೆ ಬಾಳೆ ಕಂದನ್ನುಕಡಿದ ಬಳಿಕ ಭಕ್ತರ ದರ್ಶನಕ್ಕೆ ಅವಕಾಶ ಮಾಡಿಕೊಡುವುದು ಸಂಪ್ರದಾಯ.

ಅತ್ತೆ ಮತ್ತು ಸೊಸೆ:
ಪ್ರತಿ ನಿತ್ಯ ಸೊಸೆಗೆ ಕಿರುಕುಳ ಕೊಡುತ್ತಿದ್ದ ಅತ್ತೆ ಒಂದು ದಿನ ಸೊಸೆಯನ್ನು ಹಿಂಬಾಲಿಸಿ ಬಂದಾಗ ದೇವಿಯ ಧ್ಯಾನದಲ್ಲಿ ಮಗ್ನಳಾಗಿದ್ದನ್ನು ಕಂಡು ಸಿಟ್ಟಿನಿಂದ ಮನೆಯ ಕೆಲಸಕ್ಕಿಂತ ದೇವಿಯ ದರ್ಶನ ನಿನಗೆ ಹೆಚ್ಚಾಯಿತೆ? ಎಂದು ಪಕ್ಕದಲ್ಲಿದ್ದ ಚಂದ್ರ ಬಟ್ಟಲನ್ನು ತೆಗೆದುಕೊಂಡು ತಲೆಗೆ ಕುಕ್ಕಿದ್ದರಿಂದ ನೋವು ತಾಳಲಾರದೆ ಅಮ್ಮ ಹಾಸನಾಂಬೆ ಎಂದು ಭಕ್ತಿಯಿಂದ ಕೂಗಿದಳಂತೆ. ಭಕ್ತಿಯನ್ನು ಮೆಚ್ಚಿ ಆಕೆಯನ್ನು ತನ್ನ ಸನ್ನಿಧಾನದಲ್ಲಿ ಕಲ್ಲಾಗಿಸಿಕೊಂಡಳು. ಪ್ರತೀ ವರ್ಷವೂ ಕಲ್ಲಾಗಿರುವ ಭಕ್ತೆಯು ಭತ್ತದ ಕಾಳಿನ ತುದಿಯಷ್ಟು ದೇವಿಯ ಕಡೆ ಚಲಿಸುವಳು. ಆಕೆ ದೇವಿಯ ಪಾದ ತಲುಪಿದ ಕೂಡಲೇ ಕಲಿಯುಗ ಅಂತ್ಯವಾಗುತ್ತದೆ ಎಂದು ಹಿರಿಯರು ಹೇಳುತ್ತಾರೆ.
ಇಲ್ಲಿನ ಇನ್ನೊಂದು ವಿಶೇಷವೆಂದರೆ, ಹಾಸನಾಂಬೆಯು ಶಕ್ತಿ ದೇವತೆಯಾದರೂ ಸಹ ಇಲ್ಲಿ ಪ್ರಾಣಿ ಬಲಿ ಇಲ್ಲ. ಜತೆಗೆ ದೇವಿಯ ದರ್ಶನದ ಸಮಯದಲ್ಲಿ ಇಲ್ಲಿನ ಸುತ್ತಮುತ್ತಲಿನ ಮನೆಯಲ್ಲಿ ಖಾರದ ಪದಾರ್ಥ ಹಾಗೂ ಒಗ್ಗರಣೆ ಮಾಡುವುದಿಲ್ಲ.

ಕಳ್ಳಪ್ಪನ ಗುಡಿ:
ಹಾಸನಾಂಬ ದೇವಾಲಯದ ಹೊರಗಡೆ ಒಂದು ಪುಟ್ಟ ಗುಡಿ ಇದೆ. ಇಲ್ಲಿ ನಾಲ್ಕು ಸಣ್ಣ ಸಣ್ಣ ಕಲ್ಲುಗಳಿವೆ. ಇದಕ್ಕೊಂದು ಕಥೆ ಇದೆ.
ಹಾಸನಾಂಬ ದೇವಿಯ ಮೇಲಿರುವ ಆಭರಣವನ್ನು ಅಪಹರಿಸಲೆಂದು ನಾಲ್ಕು ಜನ ಕಳ್ಳರು ಒಳನುಗ್ಗಿ ಆಭರಣಗಳಿಗೆ ಕೈ ಹಾಕಿದಾಗ ಕುಪಿತಳಾದ ಹಾಸನಾಂಬ ದೇವಿ ಕಲ್ಲಾಗಿ ಹೋಗಿ ಎಂದು ಶಾಪ ಕೊಟ್ಟಳು. ಅದರ ಪರಿಣಾಮವಾಗಿ ಆ ನಾಲ್ಕು ಜನ ಕಳ್ಳರು ಕಲ್ಲಾದರು ಎಂಬ ಕಥೆ ಇದೆ. ಇಂದಿಗೂ ಅವುಗಳನ್ನು ಕಾಣಬಹುದಾಗಿದ್ದು, ಈ ಕಳ್ಳರು ಕಲ್ಲಾಗಿರುವ ಗುಡಿಯನ್ನು ಕಳ್ಳಪ್ಪನ ಗುಡಿ ಎನ್ನಲಾಗಿದೆ.

ಹಾಲಪ್ಪನ ಗದ್ದಿಗೆ:
ಕಳ್ಳಪ್ಪನ ಗುಡಿ ಪಕ್ಕದಲ್ಲೇ ಹಾಲಪ್ಪನ ಗದ್ದಿಗೆ ಇದೆ. ಇಲ್ಲಿ 5 ಅಡಿ ಉದ್ದದ ಒಂದು ಕಂಬವಿದೆ. ಇದು ಹಾಲಪ್ಪನವರ ಗದ್ದಿಗೆ ಎಂದು ಕರೆಯುತ್ತಾರೆ.

ಶ್ರೀ ವೀರಭದ್ರ ಸ್ವಾಮಿ:
ಹಾಲಪ್ಪನ ಗದ್ದಿಗೆ ಪಕ್ಕದಲ್ಲೇ ಇದೇ ಸಪ್ತಮಾತೆಯರು ಇರುವಲ್ಲಿ ವೀರಭದ್ರಸ್ವಾಮಿ ಇರುವುದು ವಾಡಿಕೆ. ಈ ಗುಡಿಯಲ್ಲಿ ನಾಗರ ಕಲ್ಲುಗಳು ಸಹ ಇವೆ.
101 ಲಿಂಗ: ಹಾಸನಾಂಬ ದೇವಾಲಯದ ಆವರಣದಲ್ಲಿ 101 ಲಿಂಗವನ್ನು ಒಂದೇ ಸಲ ನೋಡುವ ಅವಕಾಶ ದೊರೆಯುತ್ತದೆ. ಈ ಗುಡಿಯ ಮೇಲ್ಭಾಗದಲ್ಲಿ 4 ಅಡಿ ಎತ್ತರದ ಇನ್ನೊಂದು ಮಹಾಲಿಂಗವಿದೆ.

ದರ್ಬಾರ್ ಗಣಪತಿ:
ಸಪ್ತ ಮಾತೃಕೆಯರು ಇರುವಲ್ಲಿ ಬಲಭಾಗದಲ್ಲಿ ಶ್ರೀ ವೀರಭದ್ರಸ್ವಾಮಿ, ಎಡಭಾಗದಲ್ಲಿ ಗಣಪತಿಯನ್ನು ಇರಿಸಿ ಮಾತೃಗಣಗಳನ್ನಾಗಿರಿಸಬೇಕೆಂಬ ವಿಧಿಯಿದೆ. ಅದರಂತೆ ಇಲ್ಲಿ ದರ್ಬಾರ್ ಗಣಪತಿ ಇದೆ.

ಸಿದ್ದೇಶ್ವರ ದೇವಾಲಯ:
ಹಾಸನಾಂಬೆ ದೇವಾಲಯದ ದ್ವಾರವನ್ನು ಪ್ರವೇಶ ಮಾಡಿದರೆ ಕೂಡಲೇ ಸಿದ್ದೇಶ್ವರ ಸ್ವಾಮಿ ದೇವಾಲಯ ನೋಡಲು ಸಿಗುವುದು. ಇದೊಂದು ಅಪರೂಪದ ದೇವಾಲಯವಾಗಿದೆ. ಪ್ರತಿಯೊಂದು ಶೈವ ದೇವಾಲಯದ ಗರ್ಭಗುಡಿಯಲ್ಲಿ ಶ್ರೀ ಸಿದ್ದೇಶ್ವರ ಸ್ವಾಮಿಯನ್ನು ಲಿಂಗದ ರೂಪದಲ್ಲಿ ನೋಡಬಹುದು. ಆದರೆ ಇಲ್ಲಿ ಉದ್ಭವ ಶ್ರೀ ಸಿದ್ದೇಶ್ವರ ಸ್ವಾಮಿ ಅರ್ಜುನನಿಗೆ ಈಶ್ವರನು ಪಾಶುಪತಾಸ್ತ್ರ ಕೊಡುವ ಆಕಾರದಲ್ಲಿದೆ.
ದೇವಾಲಯದ ಆವರಣವು ಆಧುನಿಕ ರೀತಿ ಇದೆ. ದೇವಾಲಯವು ಸಹ ನವೀಕರಣಗೊಂಡಿದೆ. ಗರ್ಭಗುಡಿಯಲ್ಲಿ 4 ಅಡಿ ಎತ್ತರದ 4 ಅಡಿ ಉದ್ದವಾದ ಒಂದು ಕಲ್ಲು ರೀತಿ ಇದ್ದು ಅದರ ಮೇಲೆ ಉಬ್ಬು ಚಿತ್ರವಿದೆ. ಅದೇ ಶ್ರೀ ಸಿದ್ದೇಶ್ವರ ಎಂದು ಕರೆಯುತ್ತಾರೆ. ಈ ಸಿದ್ದೇಶ್ವರ ದೇವರ ಮುಂದೆ ಒಂದು ನಂದಿ ವಿಗ್ರಹವಿದೆ ಹಾಗೂ ಗರ್ಭಗುಡಿಯ ಪಕ್ಕದಲ್ಲಿ ಒಂದು ಪುಟ್ಟ ಗುಡಿ ಇದೆ. ಅದರಲ್ಲಿ ಚಿಕ್ಕ ಗಣಪತಿ ವಿಗ್ರಹ ಇದೆ. ಈ ಒಂದು ದೇವಾಲಯವು ದ್ವಿಕೂಟಚಲವಾಗಿದೆ.
ಹಾಸನಾಂಬೆಯ ಜಾತ್ರೆ ದಿನ ಶ್ರೀ ಸಿದ್ದೇಶ್ವರ ರಥೋತ್ಸವ, ನಂತರ ಶ್ರೀ ಬಸವೇಶ್ವರ ಸ್ವಾಮಿ ತೆಪೆÇ್ಪೀತ್ಸವ ನಡೆಯುತ್ತದೆ. ನಂತರ ಚಂದ್ರಮಂಡಲ ರಥೋತ್ಸವ ಜನಾಕರ್ಷಣೆಯಾದರೆ ರಥೋತ್ಸವದ ಮರುದಿನ ದೇವಾಲಯದ ಮುಂದೆ ಕೊಂಡೋ ತ್ಸವದೊಂದಿಗೆ ಸಿದ್ದೇಶ್ವರ ಸ್ವಾಮಿ ಜಾತ್ರೆ ಮುಕ್ತಾಯವಾಗುತ್ತದೆ.

Facebook Comments

Sri Raghav

Admin