ಹುಡುಗಿಯ ವಾಟ್ಸಾಪ್ ಹುಚ್ಚಿನಿಂದ ಮದುವೆಯೇ ಮುರಿದು ಬಿತ್ತು..!

ಈ ಸುದ್ದಿಯನ್ನು ಶೇರ್ ಮಾಡಿ

Girl-Watsapp

ಲಕ್ನೋ. ಸೆ.09 : ಮದುವೆ ಮನೆಯಲ್ಲಿ ಸಾಂಬರ್‌ ಸರಿ ಇಲ್ಲ, ರಸಂ ಸರಿ ಇಲ್ಲ, ಗಂಡಿನ ಕಡೆಯವರಿಗೆ ಸರಿಯಾಗಿ ಸತ್ಕಾರ ಮಾಡಿಲ್ಲ, ಹೆಣ್ಣಿನ ಕಡೆಯವರನ್ನು ಸರಿಯಾಗಿ ನಡೆಸಿಕೊಂಡಿಲ್ಲ ಇಂತಹ ಹಲವಾರು ಕಾರಣಗಳಿಂದ ಕೊನೇ ಘಳಿಗೆಯಲ್ಲಿ ಮದುವೆಗಳು ನಿಂತು ಹೋಗಿರೋದನ್ನು ನೋಡಿದ್ದೇವೆ. ಆದ್ರೆ ಇಲ್ಲೊಂದು ಮದುವೆ ನಿಂತು ಹೋಗಿರೋದಕ್ಕೆ ಕಾರಣ ಕೇಳಿದ್ರೆ ಎಂಥವರೂ ಅಚ್ಚರಿ ಪಡದೆ ಇರಲಾರರು.

ಉತ್ತರ ಪ್ರದೇಶದಲ್ಲಿ ವಧು ಅತಿ ಹೆಚ್ಚಾಗಿ ವಾಟ್ಸಪ್ ನಲ್ಲಿ ಸಮಯ ಕಳೆಯುತ್ತಾಳೆ ಎಂಬ ಕಾರಣದಿಂದ ಮದುವೆ ನಿಂತು ಹೋಗಿರುವ ವಿಚಿತ್ರ ಘಟನೆ ನಡೆದಿದೆ. ಉತ್ತರಪ್ರದೇಶದ ಅಮ್ರೋಹಾ ಜಿಲ್ಲೆಯ ನವ್ಗಾನ್ ಸದತ್ ಎಂಬ ಹಳ್ಳಿಯಲ್ಲಿ ಈ ಘಟನೆ ನಡೆದಿದೆ. ಸದತ್ ಗ್ರಾಮದ ಯುವತಿಗೆ ತಮ್ಮ ಸಂಬಂಧದ ಹುಡುಗನ ಜೊತೆ ಬುಧವಾರ ಮದುವೆ ನಿಶ್ಚಯವಾಗಿತ್ತು. ವಧುವಿನ ಕಡೆಯವರು ಆರತಕ್ಷತೆಗಾಗಿ ವರ ಮತ್ತು ವರನ ಕಡೆಯವರಿಗಾಗಿ ಕಾಯುತ್ತಿದ್ದರು. ಆದರೆ ಅವರು ಬರಲೇ ಇಲ್ಲ. ಕೊನೆಗೆ ಫೋನ್ ಮಾಡಿದಾಗ ನಿಮ್ಮ ಹುಡುಗಿ ಹೆಚ್ಚಾಗಿ ವಾಟ್ಸಪ್ ಬಳಸುತ್ತಾಳೆ. ಆದ್ದರಿಂದ ನಮಗೆ ಈ ಮದುವೆ ಇಷ್ಟ ಇಲ್ಲ ಎಂದು ನಿರಾಕರಿಸಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.

ಇತ್ತ ವಧುವಿನ ಪೋಷಕರು, ಅವರು ಮಾಡುತ್ತಿರುವ ಆರೋಪವನ್ನು ತಳ್ಳಿ ಹಾಕಿದ್ದು, ವರನ ಕಡೆಯವರು ಕೊನೆ ಕ್ಷಣದಲ್ಲಿ ವರದಕ್ಷಿಣೆಗಾಗಿ ಬೇಡಿಕೆ ಇಟ್ಟಿದ್ದರು. ನಮ್ಮಿಂದ ಕೊಡಲು ಸಾಧ್ಯವಾಗಿಲ್ಲ ಅದಕ್ಕಾಗಿ ಮದುವೆಯನ್ನು ಕ್ಯಾನ್ಸಲ್ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ.  ಫಕೇರ್ಪುರಾದ ಖಮರ್ ಹೈದರ್ ಅವರ ಮಗನೊಂದಿಗೆ ತನ್ನ ಮಗಳ ಮದುವೆ ನಿಶ್ಚಯವಾಗಿತ್ತು.

ನಮ್ಮ ಸಂಬಂಧಿಕರು ಮತ್ತು ಸ್ನೇಹಿತರು ಎಲ್ಲರೂ ಮದುವೆಗೆಂದು ಬಂದಿದ್ದು, ವರನ ಕಡೆಯವರನ್ನು ಸ್ವಾಗತಿಸಲು ಕಾಯುತ್ತಿದ್ದೆವು. ಆದರೆ ವರನ ತಂದೆ ಕರೆ ಮಾಡಿ ಈ ಮದುವೆ ಇಷ್ಟವಿಲ್ಲ ಅಂತ ಕ್ಯಾನ್ಸಲ್ ಮಾಡಿದ್ದಾರೆ ಎಂದು ವಧುವಿನ ತಂದೆ ಪೊಲೀಸರಿಗೆ ತಿಳಿಸಿದ್ದಾರೆ. ಈ ಸಂಬಂಧ ವಧವಿನ ತಂದೆ ಉರೋಜ್ ಮೆಹಂದಿ ಅವರು, 65 ಲಕ್ಷ ರೂ. ವರದಕ್ಷಿಣೆಗಾಗಿ ಡಿಮ್ಯಾಂಡ್ ಮಾಡಿದ್ದಾರೆ ಎಂದು ವರನ ಕುಟುಂಬದ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಒಟ್ಟಾರೆ ವಾಟ್ಸ್ಯಾಪ್ ಬಳಕೆ ಆರೋಪದಿಂದ ಮದುವೆಯೊಂದು ನಿಂತು ಹೋಗಿರೋದು ವಿಪರ್ಯಾಸವೇ ಸರಿ.

Facebook Comments

Sri Raghav

Admin