ತೇಲುವ ಪಾಚಿಗಳಲ್ಲಿ ವಿಷಾಣುಗಳು ಪತ್ತೆ..!

ಈ ಸುದ್ದಿಯನ್ನು ಶೇರ್ ಮಾಡಿ

ನ್ಯೂಯಾರ್ಕ್,ಏ.10- ಕೆರೆ, ಕುಂಟೆಗಳಲ್ಲಿ ನಿಂತ ನೀರಿನಲ್ಲಿ ಕಟ್ಟಿರುವ ಪಾಚಿಯಿಂದ ಪಾಶ್ರ್ವವಾಯು ಮತ್ತು ಮಾರಣಾಂತಿಕವಾದ ವಿಷಾಣುಗಳು ಉತ್ಪತ್ತಿಯಾಗಿ ಗಾಳಿಯಲ್ಲಿ ತೇಲುತ್ತಿರುವುದು ಅಮೆರಿಕಾದ ಮೆಸ್ಸೆಚ್ಯುಟೆಸ್‍ನಲ್ಲಿ ಪತ್ತೆಯಾಗಿದೆ. ವೈಜ್ಞಾನಿಕ ಅಧ್ಯಯನದ ಪ್ರಬಂಧವೊಂದರಲ್ಲಿ ಈ ಕುರಿತು ಸಮಗ್ರ ಮಾಹಿತಿ ಪ್ರಕಟವಾಗಿದ್ದು, ಸಾವನ್ನು ವೇಗವಾಗಿ ತಂದುಕೊಡುವಂತಹ ಅಂಶಗಳಿರುವ ವಿಷ ಜೀವಾಣುಗಳು ಪಾಚಿಯಲ್ಲಿ ಉತ್ಪತ್ತಿಯಾಗುತ್ತಿದ್ದು ಅವು ಗಾಳಿಯಲ್ಲಿ ತೇಲುತ್ತಿವೆ ಎಂದು ಹೇಳಲಾಗಿದೆ.

ಜಲಾಶಯ, ತೊರೆ ಹಾಗೂ ಇತರೆಡೆಗಳಲ್ಲಿ ನಿಂತ ನೀರಿನಲ್ಲಿ ಕಂಡು ಬರುವ ಪಾಚಿಯ ವೈರಾಣುಗಳು ವನ್ಯಜೀವಿ ಹಾಗೂ ಮಾನವ ಸಂಕುಲಕ್ಕೆ ಅಪಾಯಕಾರಿಯಾಗಿವೆ. ಉಸಿರಾಟದ ಸಮಸ್ಯೆ, ಪಾಶ್ರ್ವವಾಯು, ಯಕೃತ್ ಸೇರಿದಂತೆ ನಾನಾ ರೀತಿಯ ತೊಂದರೆಗಳನ್ನು ಉಂಟು ಮಾಡಬಹುದು ಎಂದು ಅಧ್ಯಯನ ನಡೆಸಿದ ಎಟಿಎಕ್ಸ್ ಸಂಸ್ಥೆ ಹೇಳಿದೆ.

ರಾಸಾಯನಿಕ ಗೊಬ್ಬರ ಬಳಸಿದ ಜಮೀನಿನಿಂದ ಹರಿದು ಹೋಗುವ ಹಾಗೂ ಸಂಸ್ಕರಿಸದೆ ಸಂಗ್ರಹವಾಗುವ ಮಲಿನ ನೀರಿನಲ್ಲಿ ಈ ರೀತಿಯ ಅಪಾಯಕಾರಿ ಪಾಚಿಗಳು ಕಂಡುಬಂದಿವೆ. ಹೂವುಗಳ ಆಕಾರದಲ್ಲಿ ತೇಲುವ ಈ ಪಾಚಿಗಳು ನೋಡಲು ಆಕರ್ಷಕವಾಗಿದ್ದು ಜೀವರಾಶಿಗೆ ಅಪಾಯ ತಂದೊಡ್ಡಲಿವೆ. ಹವಾಮಾನ ವೈಪರೀತ್ಯದಿಂದಾಗಿ ನೈಸರ್ಗಿಕ ವಿಕೋಪಕ್ಕೂ ಇವು ಕಾರಣವಾಗಿವೆ.

ಸದ್ಯದ ಸಂಶೋಧನೆಯಲ್ಲಿ ಮೆಸ್ಸೆಚ್ಯುಟೆಸ್‍ನ ಕೊಳದಲ್ಲಿನ ಪಾಚಿಯಿಂದ ಮಾತ್ರ ಈ ರೀತಿಯ ಜೀವಾಣುಗಳು ಗಾಳಿಯಲ್ಲಿ ತೇಲುತ್ತಿರುವುದು ಕಂಡುಬಂದಿದೆ. ಜಗತ್ತಿನ ಇತರ ಭಾಗಗಳಲ್ಲಿಯೂ ಅಪಾಯಕಾರಿ ಜೀವಾಣುಗಳು ಇವೆಯೇ ಎಂಬುದನ್ನು ಸಂಶೋಧನೆ ಮಾಡಬೇಕಾಗಿದೆ ಎಂದು ವಿಜ್ಞಾನಿ ಡಾ.ಜೇಮ್ಸ್ ಸೌಥರ್‍ಲ್ಯಾಂಡ್ ಹೇಳಿದ್ದಾರೆ.

 

Facebook Comments