ಹಿಮಾಲಯದ ಪ್ರತಿಕೂಲ ವಾತಾವರಣದಲ್ಲೂ ಎಚ್‍ಎಎಲ್ ಹೆಲಿಕಾಪ್ಟರ್ ಹಾರಾಟ ಯಶಸ್ವಿ

ಈ ಸುದ್ದಿಯನ್ನು ಶೇರ್ ಮಾಡಿ

ಬೆಂಗಳೂರು, ಸೆ.9-ಉದ್ಯಾನನಗರಿಯ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಎಚ್‍ಎಎಲ್) ದೇಶೀಯವಾಗಿ ಅಭಿವೃದ್ದಿಗೊಳಿಸಿರುವ ಭಾರತದ ಹಗುರ ಉಪಯೋಗಿ ಹೆಲಿಕಾಪ್ಟರ್(ಎಲ್‍ಯುಎಚ್) ಹಿಮಾಲಯದ ಅತ್ಯಂತ ಪ್ರತಿಕೂಲ ಮತ್ತು ಅತಿ ಎತ್ತರದ ಪ್ರದೇಶಗಳಲ್ಲಿ ಸಮರ್ಥ ಹಾರಾಟ ನಡೆಸುವಲ್ಲಿ ಯಶಸ್ವಿಯಾಗಿದೆ.

ಈ ಹೆಲಿಕಾಪ್ಟರ್, ಹಿಮಾಲಯದ ಥಂಡಿ, ಉಷ್ಣ ಮತ್ತು ಅತಿ ಎತ್ತರದ ಪ್ರದೇಶದಲ್ಲಿ ವಿವಿಧ ರೀತಿಯ ಹಾರಾಟ ಮತ್ತು ಸಾಮಥ್ರ್ಯ ಪರೀಕ್ಷೆಗಳಿಗೆ ಒಳಪಟ್ಟಿದ್ದು, ಅತ್ಯಂತ ಯಶಸ್ವಿಯಾಗಿ ಕಾರ್ಯನಿರ್ವಹಿಸಿದೆ ಎಂದು ಬೆಂಗಳೂರಿನ ಎಚ್‍ಎಎಲ್ ಸಂಸ್ಥೆ ತಿಳಿಸಿದೆ.

ಲಡಾಖ್ ಪ್ರಾಂತ್ಯದ ಲೇಹ್‍ನಿಂದ ಮೇಲೇರಿದ ಈ ಹೆಲಿಕಾಪ್ಟರ್ ಸಮುದ್ರ ಮಟ್ಟದಿಂದ 3300 ಮೀಟರ್‍ಗಳಿಗೂ ಹೆಚ್ಚು ಎತ್ತರ ಇರುವ ಪ್ರದೇಶದಲ್ಲಿ ಯಶಸ್ವಿಯಾಗಿ ಹಾರಾಟ ನಡೆಸಿದೆ ಎಂದು ಎಚ್‍ಎಎಲ್ ಹೇಳಿದೆ.

ಅಲ್ಲದೇ ಐಎಸ್‍ಎ (ಇಂಟರ್‍ನ್ಯಾಷನಲ್ ಸ್ಟ್ಯಾಂಡರ್ಡ್ ಅಟ್ಮಾಸ್ಪಿಯರ್-ಅಂತಾರಾಷ್ಟ್ರೀಯ ವಾತಾವರಣ ಮಾಪಕ) 320 ಸಿ ಹವಾಮಾನದಲ್ಲೂ ತನ್ನ ಹಾರಾಟ ಸಾಮಥ್ರ್ಯ ಸೇರಿದಂತೆ ವಿವಿಧ ಪರೀಕ್ಷೆಗಳಲ್ಲಿ ಎಲ್‍ಯುಎಚ್ ಯಶಸ್ವಿಯಾಗಿದೆ.

ಲೇಹ್ ಪ್ರದೇಶದಿಂದ ಹಾರಿದ ಹೆಲಿಕಾಪ್ಟರ್ ಅತ್ಯಂತ ಎತ್ತರದ ಹಾರಾಟ ಕಾರ್ಯಕ್ಷಮತೆ ಪ್ರದರ್ಶಿಸಿದ ಬಳಿಕ 5,000 ಮೀಟರ್ ಎತ್ತರ ಇರುವ ದೌಲತ್ ಬೇಗ್ ಒಲ್ಡೀ (ಡಿಬಿಒ) ಪ್ರದೇಶದ ಸುಧಾರಿತ ಭೂಸ್ಪರ್ಶ ಸ್ಥಳ (ಎಲ್‍ಎಲ್‍ಜಿ)ದಲ್ಲಿ ಸುರಕ್ಷಿತವಾಗಿ ಇಳಿದಿದೆ ಎಂದು ಎಚ್‍ಎಎಲ್ ವಿವರಿಸಿದೆ.

ಈ ಹೆಲಿಕಾಪ್ಟರ್ ವಿಶ್ವದ ಅತ್ಯಂತ ಎತ್ತರದ ಯುದ್ಧಭೂಮಿ ಸಿಯಾಚಿನ್ ನೀರ್ಗಲ್ಲು ಪ್ರದೇಶದ ಮೇಲೆ ಯಶಸ್ವಿಯಾಗಿ ಹಾರಾಟ ನಡೆಸಿದೆ. ಅಲ್ಲದೇ ದೇಶದ ಅತ್ಯಂತ ಎತ್ತರದ ಹೆಲಿಪ್ಯಾಡ್ ಇರುವ ಅಮರ್ ಮತ್ತು ಸೋನಮ್ ಪ್ರದೇಶಗಳಲ್ಲಿ ಭೂಸ್ಪರ್ಶ ಮಾಡಿದೆ ಎಂದು ಸಂಸ್ಥೆ ತಿಳಿಸಿದೆ.

Facebook Comments