BIG NEWS : 500 ಕೋಟಿ ರೂ. ವಂಚನೆ : ದೆಹಲಿ, ಪಂಜಾಬ್ ಸೇರಿ 45ಕ್ಕೂ ಹೆಚ್ಚು ಕಡೆ ಐಟಿ ದಾಳಿ..!

ಈ ಸುದ್ದಿಯನ್ನು ಶೇರ್ ಮಾಡಿ

ನವದೆಹಲಿ, ಅ.27- ನಕಲಿ ಬಿಲ್‍ಗಳನ್ನು ಸೃಷ್ಟಿಸಿ ಸರ್ಕಾರದ ಬೊಕ್ಕಸಕ್ಕೆ 500 ಕೋಟಿ ರೂ.ಗಳಿಗೂ ಹೆಚ್ಚು ಹಣ ವಂಚಿಸಿರುವ ಹವಾಲಾ ಆಪರೇಟರ್‍ಗಳ ವಿರುದ್ಧ ಆದಾಯ ತೆರಿಗೆ ಇಲಾಖೆ (ಐಟಿ) ಅಧಿಕಾರಿಗಳು ಭರ್ಜರಿ ಕಾರ್ಯಾಚರಣೆ ನಡೆಸಿದ್ದಾರೆ. ದೆಹಲಿ, ಪಂಜಾಬ್, ಹರಿಯಾಣ, ಗೋವಾ , ಉತ್ತರಾಖಂಡ ಸೇರಿದಂತೆ ಹಲವು ರಾಜ್ಯಗಳ ಅನೇಕ ನಗರಗಳಲ್ಲಿ ಈ ದಾಳಿ ನಡೆಸಲಾಗಿದ್ದು , ಒಟ್ಟು 5.26 ಕೋಟಿ ರೂ. ನಗದು ಮತ್ತು ಚಿನ್ನಾಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ದಾಳಿ ವೇಳೆ ಹವಾಲಾ ಆಪರೇಟರ್‍ಗಳಿಗೆ ಸೇರಿದ್ದ 17 ಬ್ಯಾಂಕ್ ಲಾಕರ್‍ಗಳು ಪತ್ತೆಯಾಗಿದ್ದು , ಇವುಗಳನ್ನು ಶೋಧಿಸಲಾಗುತ್ತಿದೆ. ಇದರೊಂದಿಗೆ ಮತ್ತಷ್ಟು ಅಕ್ರಮ ಅವ್ಯವಹಾರಗಳು ಬೆಳಕಿಗೆ ಬರುವ ಸಾಧ್ಯತೆ ಇದೆ.

ಆದಾಯ ತೆರಿಗೆ ಇಲಾಖೆಯ ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿ (ಸಿಬಿಡಿಟಿ) ಅಧಿಕಾರಿಗಳು ಇಂದು ದೇಶದ 45ಕ್ಕೂ ಹೆಚ್ಚು ಸ್ಥಳಗಳಲ್ಲಿ ಏಕ ಕಾಲದಲ್ಲಿ ದಾಳಿ ನಡೆಸಿದರು. ಹವಾಲಾ ಆಪರೇಟರ್‍ಗಳು , ಅಕ್ರಮ ಹಣ ವರ್ಗಾವಣೆ ದಂಧೆ ನಡೆಸುವವರು , ಹವಾಲಾ ಎಂಟ್ರಿ ಆಪರೇಟರ್‍ಗಳು, ಮಧ್ಯವರ್ತಿಗಳು , ಕ್ಯಾಶ್ ಹ್ಯಾಂಡಲರ್‍ಗಳು ಸೇರಿದಂತೆ ಈ ವ್ಯವಸ್ಥಿತ ದಂಧೆಯಲ್ಲಿ ತೊಡಗಿರುವವರ ಅಕ್ರಮ ಅವ್ಯವಹಾರಗಳನ್ನು ಸಿಬಿಡಿಟಿ ಅಧಿಕಾರಿಗಳು ಪತ್ತೆ ಮಾಡಿದ್ದಾರೆ.

ಈ ಸಂಬಂಧ ವಶಪಡಿಸಿಕೊಳ್ಳಲಾದ ದಾಖಲೆ ಪತ್ರಗಳು ಮತ್ತು ಕಡತಗಳನ್ನು ಪರಿಶೀಲಿಸಲಾಗಿ ಐಟಿ ಇಲಾಖೆಗೆ 500 ಕೋಟಿಗಳಿಗೂ ಹೆಚ್ಚು ವಂಚಿಸಿರುವುದು ದೃಢ ಪಟ್ಟಿದೆ. ಹವಾಲಾ ಎಂಟ್ರಿ ಮತ್ತು ನಕಲಿ ಬಿಲ್‍ಗಳನ್ನು ಸೃಷ್ಟಿಸಿ ಕೋಟ್ಯಂತರ ರೂ.ಗಳನ್ನು ಪಡೆಯಲಾಗಿದೆ ಮತ್ತು ನೀಡಲಾಗಿದೆ. ಶೆಲ್ ಕಂಪೆನಿಗಳು ಭಾರೀ ಪ್ರಮಾಣದಲ್ಲಿ ಸುರಕ್ಷಿತ ಸಾಲಗಳನ್ನು ನೀಡಿರುವುದಕ್ಕೆ ಪುರಾವೆಗಳು ನಡೆಸಿವೆ.

ಈ ಶೆಲ್ ಕಂಪೆನಿಗಳು ತನ್ನ ಉದ್ಯೋಗಿಗಳನ್ನು ನಿರ್ದೇಶಕರು ಮತ್ತು ಸಂಸ್ಥೆಯ ಪಾಲುದಾರರನ್ನಾಗಿ ಘೋಷಿಸಿಕೊಂಡು ಅವರ ಮೂಲಕ ನಕಲಿ ವ್ಯವಹಾರಗಳನ್ನು ನಡೆಸಿ ಅಕ್ರಮ ಅವ್ಯವಹಾರಗಳ ಮೂಲಕ ಕೋಟ್ಯಂತರ ರೂ. ಗಳಿಸಿ ಹವಾಲಾ ಮಾರ್ಗದ ಮೂಲಕ ವರ್ಗಾವಣೆ ಮಾಡಿದೆ ಎಂದು ಸಿಬಿಡಿಟಿ ಉನ್ನತಾಧಿಕಾರಿಯೊಬ್ಬರು ತಿಳಿಸಿದ್ದಾರೆ. ದಾಳಿ ವೇಳೆ 2.37 ಕೋಟಿ ರೂ. ನಗದು ಮತ್ತು 2.89 ಕೋಟಿ ರೂ. ಮೌಲ್ಯದ ಚಿನ್ನವನ್ನು ವಶಪಡಿಸಿಕೊಳ್ಳಲಾಗಿದೆ.

ದಾಖಲೆ ಪತ್ರಗಳನ್ನು ಪರಿಶೀಲಿಸಿದಾಗ ಹವಾಲಾ ಆಪರೇಟರ್‍ಗಳು , ವಿವಿಧ ಬ್ಯಾಂಕ್‍ಗಳಲ್ಲಿ 17 ಲಾಕರ್‍ಗಳನ್ನು ಹೊಂದಿದ್ದು , ಅವುಗಳಲ್ಲಿ ಭಾರೀ ಪ್ರಮಾಣದ ನಗದು, ಆಭರಣ ಮತ್ತು ರಹಸ್ಯ ದಾಖಲೆಗಳನ್ನು ಇಟ್ಟಿರುವ ಬಗ್ಗೆ ಮಾಹಿತಿ ಲಭಿಸಿದೆ.

ಆಯಾ ಬ್ಯಾಂಕ್‍ಗಳಿಂದ ಅನುಮತಿ ಪಡೆದ ನಂತರ ಈ ಲಾಕರ್‍ಗಳನ್ನು ತೆರೆದು ಪರಿಶೀಲಿಸಲಾಗುತ್ತದೆ. ಮತ್ತಷ್ಟು ಭಾರೀ ಅಕ್ರಮ ಅವ್ಯವಹಾರಗಳು ಬಯಲಿಗೆ ಬರಲಿದ್ದು , ಈ ವ್ಯವಸ್ಥಿತ ಜಾಲದಲ್ಲಿ ಸಕ್ರಿಯರಾಗಿರುವವರು ಬಂಧನಕ್ಕೊಳಗೆ ಒಳಗಾಗುವ ಸಾಧ್ಯತೆ ಇದೆ.

Facebook Comments