ರಾಕಿಂಗ್ ಸ್ಟಾರ್ ಯಶ್‌ಗೆ ಎದುರಾಯ್ತು ಸಂಕಷ್ಟ..!

ಈ ಸುದ್ದಿಯನ್ನು ಶೇರ್ ಮಾಡಿ

ಬೆಂಗಳೂರು,ಜ.13- ಬೆಂಕಿಯುಗುಳಿ ಕಾದು ಕೆಂಡವಾದ ಬಂದೂಕಿನಿಂದ ವಿಶಿಷ್ಟವಾದ ಮ್ಯಾನರಿಸಮ್‍ನಲ್ಲಿ ಸಿಗರೇಟ್ ಹಚ್ಚಿಕೊಳ್ಳುವ ಕೆಜಿಎಫ್ ಚಾಫ್ಟ್‍ರ್-2ನ ದೃಶ್ಯಾವಳಿಯನ್ನು ಟೀಸರ್‍ನಿಂದ ತೆಗೆದು ಹಾಕುವಂತೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ತಾಕೀತು ಮಾಡಿದೆ. ಚಿತ್ರದ ನಾಯಕ ನವೀನ್‍ಕುಮಾರ್ ಗೌಡ(ಯಶ್) ಅವರಿಗೆ ನೋಟಿಸ್ ನೀಡಿರುವ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೇವೆಗಳ ನಿರ್ದೇಶನಾಲಯದ ರಾಜ್ಯ ತಂಬಾಕು ನಿಯಂತ್ರಣ ಘಟಕ, ವಿವಾದಿತ ದೃಶವನ್ನು ಸಾಮಾಜಿಕ ಜಾಲತಾಣಗಳ ಟೀಸರ್‍ನಿಂದ ತೆರವುಗೊಳಿಸುವಂತೆ ಸೂಚನೆ ನೀಡಿದೆ.

ಜ.7ರಂದು ಬಿಡುಗಡೆಗೊಂಡಿರುವ ಕೆಜಿಎಫ್ ಚಾಫ್ಟರ್-2 ಟೀಸರ್ ಹಾಗೂ ಪೋಸ್ಟರ್‍ಗಳಲ್ಲಿ ಕಂಡು ಬರುತ್ತಿರುವ ದೃಶ್ಯದಲ್ಲಿ ತಾವು ಸಿಗರೇಟ್ ಸೇದುವ ದೃಶ್ಯ ಕಂಡು ಬರುತ್ತಿದೆ. ಸಿಗರೇಟು ಮತ್ತು ಇತರೆ ತಂಬಾಕು ಉತ್ಪನ್ನಗಳ ಕಾಯ್ದೆ ಸೆಕ್ಷನ್ 5, ಕೇಂದ್ರ ಸರ್ಕಾರದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ 2004ರ ಫೆಬ್ರವರಿ 25ರಂದು ಹೊರಡಿಸಿರುವ 137 ನಿಬಂಧನೆಗಳ ಪ್ರಕಾರ ಸಿಗರೇಟು ಸೇದುವುದನ್ನು ಪ್ರಚೋದಿಸುವ ದೃಶ್ಯಗಳು ನಿಯಮ ಉಲ್ಲಂಘನೆಯಾಗಿರುತ್ತದೆ ಎಂದು ಇಲಾಖೆ ತಿಳಿಸಿದೆ.

ಲಕ್ಷಾಂತರ ಯುವ ಅಭಿಮಾನಿಗಳನ್ನು ಹೊಂದಿರುವ ಮತ್ತು ಸಾಮಾಜಿಕ ಕಳಕಳಿ ಇರುವ ನಿಮ್ಮಿಂದ ಇಂತಹ ದೃಶ್ಯಗಳು ಕಂಡು ಬರಬಾರದಿತ್ತು. ಲಕ್ಷಾಂತರ ಯುವ ಜನತೆ ನಿಮ್ಮನ್ನು ಅನುಸರಿಸುವುದು ಸಾಮಾನ್ಯವಾಗಿದೆ. ಸಿಗರೇಟ್ ಸೇವನೆಯಿಂದ ಕ್ಯಾನ್ಸರ್ ಬರಲಿದೆ. ಯುವ ಜನರು ನಿಮ್ಮನ್ನು ಅನುಸರಿಸಿ ದುಶ್ಚಟಕ್ಕೆ ಒಳಗಾಗುವ ಸಾಧ್ಯತೆ ಇದೆ. ಈಗಾಗಲೇ ಕೂಡಲೇ ಸಾಮಾಜಿಕ ಜಾಲತಾಣದಲ್ಲಿರುವ ವಿವಾದಿತ ದೃಶ್ಯಗಳನ್ನು ತೆರವುಗೊಳಿಸಿ ಆರೋಗ್ಯವಂತ ಸಮಾಜ ಕಟ್ಟಲು ಸಹಕರಿಸುವಂತೆ ಇಲಾಖೆಯ ನಿರ್ದೇಶಕರು ಮನವಿ ಮಾಡಿದ್ದಾರೆ.

ಕೆಜಿಎಫ್ ಚಾಪ್ಟರ್-2ನ ಟೀಸರ್‍ನಲ್ಲಿ ಕಂಡುಬಂದಿರುವ ದೃಶ್ಯಾವಳಿಗಳ ಪ್ರಕಾರ ನಟ ಯಶ್ ಭಾರೀ ಪ್ರಮಾಣದ ಮಿಷನ್ ಗನ್‍ನಿಂದ ಶೂಟ್ ಮಾಡುತ್ತಾರೆ. ಗುಂಡುಗಳು ಹಾರಿದ ರಭಸಕ್ಕೆ ಬೆಂಕಿಯುಗುಳಿದ ಗನ್ ಕಾದು ಕೆಂಡವಾಗಿರುತ್ತದೆ. ಆ ಗನ್‍ನ ಬ್ಯಾರಲ್‍ನಿಂದ ಶೂಟುದಾರಿ ಯಶ್ ಸಿಗರೇಟ್ ಹಚ್ಚಿಕೊಳ್ಳುತ್ತಾರೆ. ಈ ದೃಶ್ಯ ಪ್ರಕಟಣೆ ಸಂದರ್ಭದಲ್ಲಿ ಸಿಗರೇಟ್ ಸೇವನೆ ಆರೋಗ್ಯಕ್ಕೆ ಹಾನಿಕಾರಕ ಎಂಬ ಸೂಚನೆಯನ್ನು ಅಳವಡಿಸಬೇಕಿತ್ತು.

ಆದರೆ, ಅಂತಹ ಯಾವ ಸೂಚನೆಗಳು ಅಲ್ಲಿ ಕಂಡು ಬರುವುದಿಲ್ಲ. ಇಡೀ ಟೀಸರ್‍ನಲ್ಲಿ ಯಶ್ ಸಿಗರೇಟ್ ಹಚ್ಚಿಕೊಳ್ಳುವುದು ಹೈಲೆಟ್ ಆಗಿದೆ. ಒಂದು ಅರ್ಥದಲ್ಲಿ ಇದು ಪ್ರಚೋದನಕಾರಿ ಎಂದರೂ ತಪ್ಪಾಗುವುದಿಲ್ಲ. ಇಲಾಖೆ ನೀಡಿರುವ ನೋಟಿಸ್ ಪ್ರಕಾರ ನಿಯಮಾವಳಿಗಳ ಉಲ್ಲಂಘನೆಯನ್ನು ಸ್ಪಷ್ಟವಾಗಿ ನಮೂದಿಸಲಾಗಿದೆ. ಆದರೆ, ಯಾವುದೇ ಕ್ರಮ ಕೈಗೊಳ್ಳುವ ಸೂಚನೆ ನೀಡದೆ ಮನವಿಯ ದಾಟಿಯಲ್ಲಿ ಇಲಾಖೆಯ ನಿರ್ದೇಶಕರು ನೋಟಿಸ್ ನೀಡಿರುವುದು ಪ್ರಜ್ಞಾವಂತರ ಉಬ್ಬೇರಿಸಿದೆ.

ಸಾರ್ವಜನಿಕವಾಗಿ ಧೂಮಪಾನ ಮಾಡುವುದು ಮತ್ತು ಅದಕ್ಕೆ ಪ್ರಚೋದನೆ ನೀಡುವುದು ಅಪರಾಧ. ಜನಸಾಮಾನ್ಯರು ಅಂಗಡಿ ಪಕ್ಕ ನಿಂತು ಧೂಮಪಾನ ಮಾಡಿದರೂ ದಂಡ ಹಾಕುವ ಅಧಿಕಾರಿಗಳು ಜನಪ್ರಿಯ ನಟ ನಿಯಮಾವಳಿ ಉಲ್ಲಂಘಿಸಿದಾಗ ನೋಟಿಸ್ ಕೊಟ್ಟು ಕೈ ತೊಳೆದುಕೊಂಡಿರುವುದು ಚರ್ಚೆಗೆ ಗ್ರಾಸವಾಗಿದೆ.

ವಾಸ್ತವವಾಗಿ ಚಿತ್ರದ ನಿರ್ಮಾಪಕರು, ನಿರ್ದೇಶಕರು ಮತ್ತು ಯೂಟೂಬ್ ನೋಟಿಸ್ ನೀಡಿ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಬೇಕಿತ್ತು. ಆದರೆ, ಅಸ್ಪಷ್ಟವಾಗಿ ನೋಟಿಸ್ ರವಾನೆ ಮಾಡಿ ಸರ್ಕಾರ ಜವಾಬ್ದಾರಿಯಿಂದ ನುಣುಚಿಕೊಂಡಂತೆ ಕಾಣುತ್ತಿದೆ.

Facebook Comments